இரண்டாம் உலகம் விமர்சனம்

செல்வராகவனின் படங்கள் ஒரு சாரரால் கொண்டாடப்படுவதும் மறு சாரரால் கடுமையாக விமர்சிக்கப்படுவதும் வாடிக்கை, ஆயிரத்தில் ஒருவன் திரைப்படம் வெளிவந்த போது படம் புரியவே இல்லை என்று விமர்சிக்கப்பட்டு தோல்வியை தழுவியது, ஆனால் தற்போது சிறப்பான படமாக பல்வேறு விமர்சகர்களால் குறிப்பிடப்படுகிறது.


ஆயிரத்தில் ஒருவன் படம் போல இரண்டாம் உலகத்திற்கு இந்த சிக்கல் இல்லை, ஏனெனில் எப்போதுமே இந்த படம் சிறந்த படம் என்று யாரும் கூறப்போவது இல்லை.

காதலும் மோதலும் சாதலுமான இந்த உலகம், ஆனால் காதல் எதுவும் இல்லாத காமமும் மோதலும் மட்டுமேயான ஆண்களின் ஆதிக்கத்தில் இருக்கும் இன்னொரு உலகம், இந்த உலகத்தில் ஆர்யாவும் அனுஷ்காவும் உருகி காதலிக்கிறார்கள், இன்னொரு உலகத்தில் ஆர்யாவும் அனுஷ்காவும் கணவன் மனைவி ஆனால் காதலிக்காமல் அடித்துக்கொள்கிறார்கள், அந்த இன்னொரு உலகத்தில் காதல் பூக்க வேண்டுமெனில் ஒரு தூய அன்பை செலுத்தும் ஆத்மாவினால் மட்டுமே முடியும், இந்த உலகத்தில் காதலி அனுஷ்கா ஆர்யா கண்முன்பே இறந்து போகிறார் ஆனாலும்  இறந்து போன அனுஷ்காவை தேடி புறப்படுகிறார், இன்னொரு உலகத்தில் அனுஷ்காவை கண்டுபிடிக்கிறார், இந்த உலக ஆர்யாவின் தூய அன்பினால் அந்த  உலக ஆர்யாவுக்கும் அனுஷ்காவுக்கும் காதல் பூக்கிறது.

இப்படியெல்லாம் கதை சொல்லும் போது ஒரு ஃபேன்டஸி கதை போல படிக்க நன்றாக தான் இருக்கும், ஆனால் திரைக்கதையில் சற்றும் சுவாரசியம் எதுவுமே இல்லை, பேன்டஸி கதைகளில் லாஜிக் பார்க்க கூடாது என்றாலும் அதிலும் ஒரு சின்ன லாஜிக் இருந்தால் தான் ரசிகர்களுக்கு சுவாரசியமாக இருக்கும், இது எதுவும் இரண்டாம் உலகத்தில் இல்லை.

கிராபிக்ஸ் காட்சிகள் ஆயிரத்தில் ஒருவனை விட சிறப்பாக உள்ளது குறிப்பாக சிங்கம் சண்டை காட்சி நன்றாக உள்ளது, இரண்டாம் உலகம் என்ற பெயரில் ஃபாரின் லொக்கேசனில் படம் எடுத்து அதை இரண்டாம் உலகம் என காட்டுகிறார்கள், கதையில் உள்ள சுவாரஸ்யம் திரைக்கதை, காட்சிகள், லொக்கேசன், கிராபிக்ஸ் என எதிலுமே இல்லை.

இரண்டாம் உலகம் படம் இரண்டரை மணி நேரமும் அனுஷ்காவும் ஆர்யாவும் மட்டும் தான், அனுஷ்கா அழகாக இருக்கிறார், அழகாக சண்டை போடுகிறார். படத்தில் தலைவலி இல்லாமல் பார்க்க கூடிய காட்சிகள் இரண்டே இரண்டு தான், ஒன்று ஆர்யாவை கல்யாணம் செய்து கொள்ள அனுஷ்கா கேட்கும் காட்சி, ஆர்யாவும் அனுஷ்காவும் இரவு முழுக்க பேசிக்கொண்டு ஒரு முத்தத்திற்காக காத்திருக்கும் காட்சி, இந்த இரண்டு காட்சிகள் மட்டுமே தலைவலி ஏற்படுத்தாத காட்சிகள்.

மதிப்பெண்கள் 2.5 / 5

# நீங்கள் படம் பார்த்துவிட்டீர்களா? உங்கள் கருத்து என்ன?