மோடிக்கு நடந்த திருமணம் குழந்தைப் பருவத்தில் நடந்தது; அவரை விமர்சனம் செய்பவர்கள், குழந்தை திருமணத்தை அங்கீகரிக்கின்றனரா?

மோடி திருமணமானவர் என முதல் முறையாக வெளியிட்டு இருப்பது குறித்து, காங்கிரஸ் தலைவர்கள் தொடர்ந்து அவரை விமர்சனம் செய்து வருகின்றனர். அதற்கெல்லாம் பதில் அளிக்கும் வகையில் பாஜகவின் செய்தித் தொடர்பாளர் ரவி ஷங்கர் பிரசாத்  "நேரு குடும்பத்திலும் இந்திரா காந்தி குடும்பத்திலும் உள்ள விவகாரங்கள் குறித்து பாஜக நன்கு அறியும். எனினும், நாகரீகம் கருதி நாங்கள் அதை விமர்சனம் செய்வதில்லை" என்று கூறியுள்ளார்.

 பாஜகவின் மற்றொரு செய்தித் தொடர்பாளர் நிர்மலா சீதாராமன் இது குறித்து கூறுகையில், "மோடியின் திருமண விவகாரம் தொடர்பாக ராகுல் விமர்சனம் மேற்கொள்ளும் முன் வேட்புமனு விவரங்களை நன்கு படித்திருக்க வேண்டும். மோடி உண்மையைதான் அதில் தெரிவித்துள்ளார். இதில் ஏதும் தவறில்லை. மேலும், இது குறித்த மோடியின் மனைவியே எதிர்ப்பு தெரிவிக்கவில்லை. பெண்கள் அமைப்புகள் சில மோடி குறித்து விமர்சனம் செய்கின்றனர். நான் அவர்களிடம் கேட்க நினைப்பது, அவர்கள் குழந்தை திருமணத்தை அங்கீகரிக்கின்றனரா? என்று தான். மோடியின் திருமண விவகாரம் குறித்து அவரது சகோதரர் நேற்று எங்களுக்கு கடிதம் ஒன்றை எழுதியுள்ளார். அதில், மோடிக்கு நடந்த திருமணம் குழந்தைப் பருவத்தில் நடந்தது என்று விளக்கியுள்ளார்" என்றார்.