அமெரிக்காவில் இருக்கும் ஏழை மக்களின் உணவகங்களைவிட, அம்மா உணவகங்கள் த‌ரத்தில் உயர்ந்திருக்கிறது- எகிப்து அதிகாரிகள் பாராட்டு

எகிப்து நாட்டின் வர்த்தகம் மற்றும் தொழில்துறையின் தொழில்நுட்ப மதிப்பீட்டாளர் டாக்டர் அகமது கலீல் மற்றும் அத்துறையின் அங்கீகார இயக்குனர் முகமது அப்துல் ரெஸ்க் உள்ளடக்கிய குழு சென்னை வந்திருந்தது. நேற்று சென்னை பொது மருத்துவமனையில் உள்ள அம்மா உணவகம் மாநகராட்சி அதிகாரிகளால் இவர்களுக்கு சுற்றி காண்பிக்கப்பட்டது. அப்போது அங்கு வழங்கப்பட்ட உணவு வகைகளை சுவைத்த அப்துல் ரெஸ்க் இந்த உணவுப் பொருட்களின் விலைப் பட்டியல் உலகின் பிற பகுதிகளில் பெறப்படும் கட்டணத்தையே ஒத்திருந்தது என்று குறிப்பிட்டார். சுவையான மற்றும் ஆரோக்கியமான உணவு வகைகளே இங்கு பொதுமக்களுக்கு அளிக்கப்படுகின்றது என்று கூறிய ரெஸ்க், இது மாநில அரசின் ஒரு நல்ல முயற்சி என்றும் பாராட்டினார். இந்த நடைமுறையை தங்கள் நாட்டிலும் செயல்படுத்தமுடியும் என்ற நம்பிக்கையை அவர் வெளியிட்டார்.

அம்மா உணவகங்களின் நடைமுறையையும் அதனால் மக்களுக்கு கிடைக்கும் நன்மைகளையும் தாங்கள் கவனித்ததாக அகமது கலீல் கூறினார். அமெரிக்காவில் நடைபெற்றுவரும் ஏழை மக்களின் உணவகங்களைவிட இவை தரத்தில் உயர்ந்திருப்பதாக இவர்கள் தெரிவித்தனர்.